No 628 (ինտերնետային No 788), Հունվարի 30 2007 թ., երեքշաբթի
ՌՍԻ ՊԱՌԱՎԸ
«ՈՒԶԵ, ԵՂՍՈ, ԷԼԻ ՈՒԶԵ, ԱՍԱ ԷԼ ԻՆՉ ՔԵԶ ԿՍԱԶԵ»
Օրերս ավարտվեց Ռ. Քոչարյանի հերթական այցը Ռուսաստան: Անկեղծ ասած,
վերջին ժամանակներս պարոն Քոչարյանն այնքան է այցելում Ռուսաստան, որ ծագում է
բնական մի հարց. իսկ ե՞րբ է նա լինում տանը, էլ չեմ ասում երկիրը կառավարելու մասին:
Թեպետ, անկեղծ ասած, ինչ-որ ներքին զգացում ինձ հուշում է, որ այդ հանդիպումների
ժամանակ հենց երկիրը կառավարելու մասին էլ խոսք էր գնում: Դատեք ինքներդ, սիրելի
բարեկամներ:
Առաջին անգամ պրն Քոչարյանն այցելեց քաղաքամայր Մոսկվա «մասնավոր այցով»: Հարց
է ծագում. այդ ինչ մասնավոր գործեր կարող է ունենալ ուրիշ երկրի մայրաքաղաքում
պետության ղեկավարը: Տարբերակ առաջին` բարեկամներ (վերջիվերջո աշխարհասփյուռ ազգ
ենք, եւ ոչ մի տարօրինակ բան չի լինի, եթե պարզվի, որ պրն Քոչարյանն էլ ինչ-որ
կորած-մոլորած մորաքույր ունի Մոսկվայում): Սակայն այդ դեպքում ի՞նչն էր խանգարում
նախագահի մամուլի ծառայությանը հանգստացնել հպատակներին՝ ասելով ճշմարտությունը:
Տարբերակ երկրորդ` այդ տարբերակը շատ անձնական է եւ այդ պատճառով այստեղ այն չի
քննարկվում: Տարբերակ երրորդ` պարոն Պուտինը չափազանց կարոտել էր իր ստրատեգիական
դաշնակցին եւ այդ պատճառով էլ չդիմացավ մինչեւ այցի սկիզբը: Ինչ խոսք, սա բավականաչափ
հավանական տարբերակ է, սակայն այստեղ եւս ծագում է մի շատ բնական հարց (ի դեպ,
նկատեցիք, չէ, հոդվածը նոր ենք սկսել, սակայն արդեն մի քանի բնական հարցադրում
արել ենք: Դե այդպիսին է մեր երկիրը` խիստ բնական) այդ ինչ հարցեր են, որ սուպերերկրի
նախագահը առանց մեր Քոչարյանի լուծել չի կարողանում: Ակամայից ներքին հպարտություն
եմ զգում մեր երկրի եւ հարազատ Քոչարյանի համար, սակայն ցավով պետք է նշեմ, որ
այս տարբերակն էլ գիտական ֆանտաստիկայի ոլորտից է: Իսկ ինչ վերաբերում է կարոտելուն,
ապա ասուլիսներից մեկում պրն Պուտինը նշել է, որ աշխատանքային ժամերին շատ է կարոտում
իր ընտանիքին, որի կազմի մեջ, որքան ինձ հայտնի է, Ռոբերտ Սեդրակիչը չի մտնում
(եթե ինչ-որ փոփոխություններ են տեղի ունեցել` ներողություն եմ խնդրում): Վերջապես,
եթե պրն Պուտինը ինչ-որ կերպ ցանկանում էր նոր հանձնարարականներ տալ` դա կարող
էր անել պարզապես հեռախոսով: Մի խոսքով, առաջին հայացքից թվում է, որ պարոն Քոչարյանի
առաջին այցի գաղտնիքը այդպես էլ չի բացահայտվի:
Սակայն թույլ կտամ ինձ լսարանի ուշադրությունը հրավիրել եւս մեկ` թվով չորրորդ
տարբերակի վրա: Գիտե՞ք ինչ, ես այնուամենայնիվ կարծում եմ, որ պրն Քոչարյանն այցելեց
պրն Պուտինին, որպեսզի վերջինիցս տեղեկանա, թե ինչ հարցեր է թույլատրված բարձրացնել
Սոչիում կայանալիք հանդիպմանը: Ասում եմ, որ նախաձեռնողը հենց ՀՀ ղեկավարն էր,
քանզի հակառակ դեպքում բեմահարթակ կիջներ արդեն հիշատակված հեռախոսը:
Ինչեւիցե, անդրադառնանք Սոչի կատարած այցին: Ինչպես հայտնեցին հայաստանյան լրատվամիջոցները,
իր հարավային նստավայրում ՌԴ նախագահն այս ամիս ընդունել է Գերմանիայի կանցլեր
տիկին Մերկելին, էլի ինչ-որ մեկին եւ Քոչարյանին: Այս եղանակով, հավանաբար, լրատվամիջոցը
փորձում էր ընդգծել, պրն Քոչարյանի նշանակալից դերը միջազգային թատերաբեմում: Ինչ
լավ է, որ այսքան միամիտ լրագրողներ ունենք: Ախր Պուտինը Սոչիում հանդիպում է ոչ
միայն արտասահմանյան հյուրերի, այլեւ բազմաթիվ ռուսաստանյան պաշտոնյաների, վերջիվերջո
տան ծառայողների, խոհարարների, հավաքարարների եւ այլոց հետ:
Սակայն անդրադառնանք բուն հանդիպման թեմաներին: Նախ, նորից ըստ լրատվամիջոցների,
կողմերը իրենց գոհունակությունը հայտնեցին ՌԴ-ում ավարտված Հայաստանի տարվա կազմակերպման
կապակցությամբ: Իսկապես, արդյունքները ապշեցուցիչ են: Հաշվետու տարվա ընթացքում
ՌԴ-ում նեոնացիստների ձեռքից զոհվեց այնքան հայ եւ հայաստանցի, որ նույնիսկ այդ
ողբերգական միջադեպերի սոսկ թվարկումը կարող է հիասթափեցնել հայ-ռուսական բարեկամության
ամենակրքոտ կողմնակցին: Կարծում եմ Հայաստանի քաղաքացիները առավել բավարարված կլինեին,
եթե մեր երկրի ղեկավարը բարձրացներ հենց այդ հարցը, այլ ոչ թե Պուտինի հետ հիանար
ռուս պրովինցիայում անցկացված միջոցառումների առիթով:
Քննարկվեցին այլ կարեւոր հարցեր եւս: Պարզվում է, Պուտինն ինչ-որ առնչությամբ հայտարարել
է, որ Հայաստանում կատարած ներդրումների ծավալով ՌԴ-ն զբաղեցնում է «խայտառակ երկրորդ
տեղը»: Պարոն Քոչարյանը հանգստացրեց ավագ եղբորը՝ վստահություն հայտնելով, որ մինչեւ
մարտ ամիս Ռուսաստանն իր ներդրումների ծավալով դուրս կգա «պատվավոր առաջին տեղը»:
Ավելին, Հայաստանի քաղաքացիները մոտավոր պատկերացում կազմեցին, թե ինչ ճանապարհով
ՌԴ-ն պետք է ապահովի այդ ներդրումների ծավալը: Պրն Պուտինը հայտարարեց, որ մեր
երկրի նկատմամբ շահագրգռվածություն է հայտնել «Ռոսատոմ»-ը: Խոսքը գնում է Հայաստանում
ուրանի հանքերի որոնման եւ հնարավոր շահագործման մասին: Հիշեցնենք, որ ընդամենը
մի քանի ամիս առաջ ՀՀ բնապահպանության նախարարը կտրականապես հերքեց մեր երկրում
ուրանի որոնումների եւ այդ հանքերի հնարավոր շահագործման մասին լուրերը՝ հայտարարելով,
որ «ուրանը` ուրան է»: Իսկ ով մեզ կբացատրի, թե ինչպիսի էկոլոգիական վտանգներ է
կրում ուրանի հանքի շահագործումը, եթե այդպիսիք կան: Վերջիվերջո մեր երկիրն այդքան
էլ մեծ չէ, եւ եթե պրն Պուտինն իր երկիրը չի ափսոսում, ապա մենք ուրիշը չունենք:
Մի խոսքով, այս հանդիպումից ստեղծվեց հետեւյալ տպավորությունը. մի գեղեցիկ օր պարոն
Պուտինն արթնացավ եւ հասկացավ, որ Հայաստանում դեռ բան կա, որ նա չի գրպանել եւ
հասկանալով այդ ամենը` Սոչի հրավիրեց իր հավատարիմ Քոչարյանին, եւ Քոչարյանն էլ
տվեց՝ ինչ ինքն ուզում էր:
No 628 (ինտերնետային No 788), Հունվարի 30 2007 թ., երեքշաբթի