No 644 (ինտերնետային No 804), Մարտի 27 2007 թ., երեքշաբթի
ԱՌԱՆՑ ՄՈՆՏԱԺԻ
«ԺԱՌԱՆԳՈՒԹՅԱՆ» ՆԱԽԸՆՏՐԱԿԱՆ ՏԵՍԱՀՈԼՈՎԱԿԸ
«Չորրորդ իշխանությունը» շարունակում է ներկայացնել խորհրդարանական ընտրություններին
մասնակցող կուսակցությունների նախընտրական տեսահոլովակների սցենարները: Այսօր հերթը
Րաֆֆի Հովհաննիսյանի «Ժառանգություն» կուսակցությանն է, եւ քանի որ քաղաքական այդ
ուժը ֆինանսական պրոբլեմներ չունի (կուսակցության ֆինանսավորման մասին ողջ ինֆորմացիան
ամփոփված է կուսակցության անվանման մեջ, մենք մեզ թույլ կտանք բավականին համարձակ
սցենար առաջարկել: Եվ այսպես.
Հնչում է Մոցարտի «Ռեքվիեմը»: Ցուցադրվում են վերջին 3000 տարիների ընթացքում հայ
ազգի գլխին իջած ամենադաժան ու ճակատագրական կադրերը, Ավարայրի ճակատամարտ (դոկումենտալ
կադրեր), Սարդարապատի ճակատամարտ (մասնակիցների վկայություններ) եւ «Ժառանգություն»
կուսակցության գրասենյակի գրավումը: «Ժողովրդի համար ճակատագրական պահերին հայ
ազգը միշտ էլ ծնե՛լ է հերոսներ, ովքեր պատռել են ստրկության շղթան», հնչում է հաղորդավարի
խրոխտ ձայնը, ու էկրանին հայտնվում է Րաֆֆի Հովհաննիսյանը՝ լայն ժպիտով: Բայց՝
միանգամից չի հայտնվում: Սկզբում Վարդան Մամիկոնյանի լուսանկարն է (դեղնած ու եզրերը
ծալած), հետո՝ Դավիթ Բեկը (էքսկլյուզիվ հարցազրույց), հետո՝ Անդրանիկ փաշան, ու
վերջում՝ Րաֆֆի Հովհաննիսյանը (սա պիտի ընդգծի պրն Հովհաննիսյանի բացառիկ համեստությունը):
Էկրանին հայտնվում է Րաֆֆի Հովհաննիսյանի սեւ-սպիտակ լուսանկարը, ու պատկերը կամաց-կամաց
գունավոր է դառնում: Վերջում պատկերը կենդանանում է: Րաֆֆի Հովհաննիսյանը կանգնած
է Ազատության հրապարակում՝ Եռագույնի կողքին: Եվ արծվենի հայացքով նայում է դեպի
անհունը (խոսքը, հասկանալի է, Արարատ լեռան մասին է): «Մենք մեր հայացքը պիտի ուղղենք
դեպի ապագա՛ն», հաղթական ձայնով արտասանում է նա: «Գա~ն, գա~ն, գա~ն...», հնչում
է արձագանքը... Արագ-արագ ցուցադրվում են մի քանի կադրեր՝ ՆԱՏՕ-ի շենքը, Քոչարյանին
ուղղված հարցերը, տանկի վրա ամրացված Եռագույնը, իր ելույթը Ստամբուլում... Ապա
կադրերը նորից դառնում են սեւ ու սպիտակ: Էկրանով մեկ երեւում է «Ժառանգության»
գրասենյակի վրայի կողպեքը: Ու լսվում է խրոխտ մի ձայն. «Բանալին ձեր ձեռքո՛ւմ է.
բոլորս դեպի ընտրություններ»:
No 644 (ինտերնետային No 804), Մարտի 27 2007 թ., երեքշաբթի
- «ՉԻ» ռիթմով. ԲՀԿ-ում լարված իրավիճակ է
- «ՉԻ» ռիթմով. Սերժ Սարգսյանն ու նրա կադրային դեֆիցիտը
- «ՉԻ» ռիթմով. Նեմեց Ռուբոն երկու տեղում էլ պարտվել է
- Բանդիտական հայաստան. Կոալիցիոն համագործակցություն կրիմինալի, ոստիկանության եւ դատախազության միջեւ
- Մամլո հաղորդագրություն. Խառնակչություն կամ անգրագիտություն