Ամենաանկեղծ թեկնածուն

«ՉԻ» - Հենց միայն այս անկեղծության համար արժե, որ ընդդիմության միասնական թեկնածուն Պարույր Հայրիկյանը լինի։ Ուրիշները սարուձոր են ընկնում, երկար-բարակ դատողություններ են անում ու ոլորապտույտ ձեւակերպումներով գովազդում իրենք իրենց, իսկ նա պարզ ասում է` ամենալավ թեկնածուն ես եմ։

Ափսոս միայն, որ նախագահ դառնալուն պես Պարույր Հայրիկյանը մտադիր է ոչ թե պետության առջեւ ծառացած կարեւորագույն քաղաքական ու սոցիալ-տնտեսական խնդիրները լուծել, այլ փոխել լեզվի մասին օրենքը եւ միասնական ուղղագրություն մտցնել։ Չնայած` դա նույնպես կարեւոր է։ Համենայն դեպս, դրանից հետո Հայաստանը կշարունակի ոչ թե դատարկվել, այլ դատարկուել, ինչն արդեն իսկ աննախադեպ յաջողութիւն կլինի։ Մնում է, որ հայ ժողովուրդը համակերպվի իրադարձությունների զարգացման այսօրինակ սցենարին։