| Օրերս հայաստանյան լրատվամիջոցներից
մեկը կարծիք էր հայտնել, որ ոստիկանության Չարենցավանի բաժնում սպանված 24-ամյա
Վահան Խալաֆյանի սպանության մեղավորն ու պատասխանատուն Սերժ Սարգսյանն է
ու նրա կողմից ղեկավարվող ապօրինի իշխանությունը: Այս առումով առարկություններ
չեն կարող լինել: Պարզապես հարկ ենք համարում ընդգծել, որ մարդ սպանելու
եւ հոշոտելու «բարի ավանդույթի» հեղինակը Ռոբերտ Քոչարյանն է, որի օրոք հազարավոր
այդպիսի դեպքեր են գրանցվել: Ի վերջո, Քոչարյանն ինքը չխորշեց սպանելու պատասխանատվություն
վերցնել իր վրա ու կրակ արձակել խաղաղ ցուցարարների վրա եւ սպանել 10 ՀՀ
քաղաքացու: Այս փաստը երբեք որեւէ մեկը չի կարող մոռանալ:
Ուշագրավն, իհարկե, այս պատմության մեջ հետեւյալն է. Սերժ Սարգսյանի ու նրա
ռեժիմի «մարդասպան» լինելու մասին խոսակցությանը նախորդեց Ռոբերտ Քոչարյանի
որսի պատմությունը: Ստացվում է, որ Ռոբերտ Քոչարյանն ու Սերժ Սարգսյանն իրար
հետ մամուլում տեղ գտած մեսիջներով են «շփվում»: Սերժ Սարգսյանը «գաղտնազերծում»
է Քոչարյանի էլիտար որսի լուսանկարները, իսկ Քոչարյանը «հակադարձում է» այսպես՝
եթե ես առյուծ եմ սպանել, ապա դու մարդասպանների թագավորն ես, ու ինքդ էլ
մարդասպան ես: Տեսնենք ինչով կավարտվի ներտեսակային պայքարը:
|
Թուրքիայի
արտգործնախարարը հայտարարել է, թե Թուրքիան, Հայաստանը եւ Ադրբեջանը մի քանի
ամիս «լուռ դիվանագիտություն» կվարեն, որից հետո կոնկրետ քայլեր կձեռնարկվեն
հայ-թուրքական արձանագրությունների եւ Կովկասում կայունության հաստատման
ոլորտում: «Կովկասում կայունություն հաստատել» ասելով՝ Դավութօղլուն, բնականաբար,
ղարաբաղյան խնդիրը նկատի ունի: Ընդամենը մի քանի օր անց էլ, ինչպես հայտնի
է, Ռուսաստանի նախագահն է մեկնելու Թուրքիա, եւ քննարկվելիք առանցքային խնդիրներից
մեկը լինելու է հենց Ղարաբաղի հարցը:
Երեկ
ՀՀ կառավարության շենքի մոտ աննախադեպ եռուզեռ էր. հենց մուտքի մոտ բողոքի
մի քանի ակցիաներ էին ընթանում: Այդ ակցիաների մասնակիցների թիվը այնքան
շատ էր, որ իշխանությունները ստիպված էին ոստիկանական հավելյալ ուժեր այնտեղ
բերել: Ինչպես երեւում է, նմանատիպ ակցիաների քանակն ու հաճախականությունը
գնալով միայն աճելու է:
Խմբագրություն
այցելած երիտասարդը թեեւ մի քիչ շփոթահար ու հուսահատված է երեւում, բայց
ասում է, որ վճռական է ու շարունակելու է պայքարել: Իրենց ընտանիքի կորցրած
տունը ետ բերելու նպատակով ուրիշ թերթեր էլ է գնացել, նյութեր են հրապարակվել,
բայց քանի որ ոչինչ չի փոխվել, մի վերջին հույսով հիմա էլ ուզում է «Չորրորդի»
միջոցով դիմել «ում որ հարկն է»:
